Mecnûn-i Râh-ı Aşkam Bilmem Akıl Ne Şeydir

NUTK-İ ŞERÎF

Mecnûn-i râh-ı 'aşkam bilmem 'akıl ne şeydir

Bir meyden olmuşam mest ayâ o mey ne meydir

'Aşk ile Hayy u Hû'ya âid dürür zamîrim

Esmâ vü fi'l-i âlem yanımda hây u heydir

Bir dem idi ki kalbim elvâh-ı 'akl okurdu

Dest-i tahayyür ile ol nâme şimdi tayydır

Za'f u nehâfet ile cismim hayâl olupdur

Zanneylerim ki anı hâke fütâde feydir

Hayretdeyem özümden yâ Rab ne turfe şeydir

Kim şekl-i âdemîde ne mürde vü ne haydır

Bir dem hurûş u pür-gam bir dem hâmûş u bî-dem

Gûyâ ten-i nizârım neyzen elinde neydir

Geh geh dalâlet ile nefsim yolun yitirir

Gâhî hidâyet ile merd-i nîk-peydir

Gerçi sözün Rusûhî pür-sûz u bâ-şererdir

Ammâ 'aceb ki halka bârid gelir çü deydir

Şeyh İsmail Ankaravî

Kuddise Sırruh