Evvel Dahi Vâr İdi Cânımda Bu Aşk Odu

NUTK-İ ŞERÎF

Evvel dahi vâr idi cânımda bu 'aşk odu

Eşkere etmez idim bilirdim ki dost kodu

Dört kitâbı şerh eden bulmadı 'aşka çâre

Ne beğler ne sultânlar ne müderris ne kâdı

Yer gök kâim ırılmaz yeller esüp deprenmez

Her nesne muhkem olur 'aşk olıcak bünyâdı

'Aşk anadan doğmadı kimseye kul olmadı

Hükmüyle esîr kılar cümle bilişi yâdı

Günde bin kez yanaram râzıyam ben şol oda

Zîrâ şekerden şîrin bana 'aşkının odu

'Aşka Mecnûn olanlar assı-ziyândan fâriğ

Korkmaz ıssı sovukdan pes ne biliser odu

Ezelden benim fikrim "ene'l Hakk" idi zikrim

Henüz dahi doğmadan ol Mansûr-ı Bagdâdî

'Aşk odu cûş eyledi cânımı hôş eyledi

Kimse söyündüremez cânımda yanan odu

'Aşk çengine düşenin melâmet olur işi

Anın içün bed-nâmdır miskîn Yûnus'un adı

Yûnus Emre

Kuddise Sırruh